Aqynnyń týǵan jeri Atyraýda poezııa padıshasynyń ádebı murasyn nasıhattaýǵa arnalǵan sharalar jıi uıymdastyrylady. 2016 jyly oblys ortalyǵynda eńseli eskertkish ornatyldy. О́ńirdegi ónerli jastardyń basyn qosqan «Farıza juldyzdary» jas aqyndar klýby quryldy. Ǵ.Slanov atyndaǵy oblystyq ǵylymı-ámbebap kitaphanasynda, Nazarbaev zııatkerlik mektebinde «Farıza Ońǵarsynova kabıneti» ashyldy. Aqyn oqyǵan H.Dosmuhamedov atyndaǵy Atyraý memlekettik ýnıversıtetinde memorıaldyq taqta ornatyldy. Oblystaǵy mádenıet mekemeleri men bilim berý uıymdarynda poezııa padıshasynyń rýhyna arnalǵan sharalar ótip turady. Munyń bári týǵan jeriniń ardaqty perzentine degen qurmet-yqylasy.
-«Farıza juldyzdary» klýbynyń músheleri respýblıkalyq ádebı baıqaýlarda júldeger atandy. Shyǵarmalary basylym betterinde jarııalanyp júr. Bıyl Atyraý jas aqyndarynyń antologııasyn shyǵarý, keshterin ótkizý josparda bar. Klýbtyń maqsaty Farıza Ońǵarsynovanyń shyǵarmashylyǵyn nasıhattap qana qoımaı, atyraýlyq jas talanttarǵa qoldaý kórsetý, qanat bitirý. Kitaphanadaǵy «Farıza Ońǵarsynova kabıneti» shyǵarmashylyqpen aınalysatyn jastardyń basyn qosatyn, kezdesýler uıymdastyratyn, Atyraýǵa kelgen zııaly qaýym ókilderi arnaıy at basyn buratyn quthanaǵa aınaldy. Osy baǵyttaǵy jumystarymyz bıyl da jalǵasady. Mahambet atyndaǵy oblystyq qazaq drama teatrymen birlesip aqyn shyǵarmashylyǵyna arnalǵan mıýzıkl daıyndaýdy oılap otyrmyz - deıdi klýb jetekshisi, aqyn Álııa Dáýletbaeva.
Aqynnyń dúnıeden ozǵan kúninde aımaqtaǵy zııaly qaýym ókilderi men jastar eskertkishke gúl shoqtaryn qoıyp, óleńderin oqydy, estelikter aıtty. Bul úrdistiń dástúrge aınalyp kele jatqany da «Joǵalmaımyn, joqtaýshy halqym barda» degen aqyn jyrynyń aqıqatqa aınalǵanynyń aıǵaǵy.
Baqytgúl BABASh,
«Egemen Qazaqstan»
